МОКШЕНЬ КЯЛЬСА АТРИБУТИВНАЙ ПРИДАТОЧНАЙ МАРХТА СЛОЖНОПОДЧИНЕННАЙ ВАЛРИСЬМОТНЕ (художественнай произв
Рогожина В. Ф.,
МОКШЕНЬ КЯЛЬСА АТРИБУТИВНАЙ ПРИДАТОЧНАЙ МАРХТА СЛОЖНОПОДЧИНЕННАЙ ВАЛРИСЬМОТНЕ
(художественнай произведениянь коряс)
Мекольдень пингть синтаксисонь кизефкснень лангс кармасть шарфнема сяда лама мяль. Но кой-кона кизефксне тянемс кърхкаста педа пес апак ватт.
Рузонь кяльса определительнай придаточнайхнень ванозень Н.С.Валгинась. Сон явфты тя типть коряс кафта подгруппат: 1) присубстантивно-определительнай валрисьмот и 2) приместоименнай-определительнай валрисьмот. И придаточнай пяльксти сувафтсь тяфтама союзнай валхт: который (кона), какой (кодама), чей (кинь), что (мезе), где (коса), куда (коза), откуда (коста) и союст: чтобы (штоба), как словно (бъта), как будто (кода бъта) и стак тов [2, С. 319-325].
Мокшэрзянь кяльхнень эса тя типть васенцеда ванозе М.Н. Коляденков [3, С. 279-284 ].
Меле атрибутивнай придаточнайхнень ванозень И. С. Бузаков [1, С. 113-119).]
Атрибутивнай придаточнай сложноподчиненнай пялькс мархта валрисьмотне – тя стама придаточнай валрисьмот, конатнень эса тиендеви сяда шарьхкодевикс главнай пяльксть кодамовок предметонь няфти членоц (валоц), нолдаф определениять функциянзон. Тяфтама валрисьмотнень эса главнай пялькссь фалу веши эстеенза определения. Предметонь няфти валсь моли существительнайкс или лия корхтамань пяльксса, кона ащи существительнаень смузьса [4, С.141-142]. Кепотьксонди: «Молитватнень эса, Маря, азонтф Шкайнь менелень эряф, конань кивок мъзярдонга ашезе няе и кивок аф содасы»(Т. Кирдяшкин «Кели Мокша»).
Станя же главнай пяльксонь определяемай валть видеса молихть ся няфтемань и стама определительнай местоимениятне, конатнень смузьснон панчсесыне определительнай придаточнай пяльксь. Ня местоимениятне нолявихть сънярда, мъзярда эряви сяда шарьхкодевиста няфтемс, кодама главнай валрисьмонь членти кандови придаточнай пялькссь или жа определяемай существительнайть лангс главнай пяльксса шарфневи башка мяль: видеста ли кандови атрибутивнай придаточнайсь тя или тона предметть лангс, а аф лия кодамовок тяфтама жа однороднай предметонь лангс. Тяфтама придаточнайхнень эса фалу азондови ся предметть действиянц, состояниянц, свойстванц, качестванц колга, конат эсост эрсихть фалу или аф сембе пингть, а аньцек кой-мъзярс:
«Мон аф стама ломаттнень лацан, конат эрь ката мявкстомати синьцке аф содасазь месендихть» (Т. Кирдяшкин «Кели Мокша»).
«Мезе арьсихть цёранятне ся пингть, мъзярда сърхкатада од планетас лиема» (А. Тяпаев «Тяште лангонь алашат»).
Главнай пяльксть мархта атрибутивнай придаточнайхне сотовихть тяфтама союзнай валхнень вельде:
кона: «Апак корхтак кеподезень сельмонзон вяри и кармась видеста ванома ковть лангс, кона ся пингть уйсь ару менельгя» (Т. Кирдяшкин «Кели Мокша»);
кие: «Сон аф кельгсы стама ялгать, кие васькафнема туль» (А. Малькин «Ялгань вал»).
Ня союзнай валхне согласовандайхть лувксонь и падежень коряс главнай валрисьмоста определяндави существительнайть мархта. Союзнай валхне васьфневихть аф аньцек основной (аф определеннай склоненияса), но тяфта же указательнай (определеннай) и притяжательнай склонениясовок. Кепотьксонди: «Няфтезень стенать ваксс стяфтф кафкса сюроса цянкнень, конатнень песост пяштешка бълдомнят» (Г. Пинясов «Вагон модамарь»).
«Антон содазе, заводса аш куля, конань афолезе марьсе ърьвац» (С. Ларионов «Хрусталень пайкт»). Союзнай валса ащи родительнай падежса.
«Витянь бабанц ули сонцень шкайняц, конанди сон озонкшни кудса» (А. Тяпаев «Тяште лангонь алашат»). Союзнай валса ащи дательнай падежса.
Станя же васьфневихть придаточнай пяльксса и лия союзнай валхт. Кепотьксонди:
коса: «И эстокигя повондсь стама таки условияс, коса педа-пес проверявсь моряконь ёнец-смузец» (Г. Пинясов «Кшись, кшнись и якстярь тяштенясь»);
коста: «И эрявсь въдь — повсь китть шовоньц ся вастти, коста шави фонтаноц» (Г. Пинясов «Тельняшка»);
куваня: «И козк цёранятне лиссть пялдонза, атясь няфтезе кить, куваня эряви тумс» (А. Тяпаев «Тяште лангонь алашат»);
мъзярда: «Ся пингть, мъзярда сувась урядниксь, кодаль сисем ленгянь карьхть» (Т. Кирдяшкин «Кели Мокша»);
коза: «Ардонь автобусса, ардонь метроса, мекпяли, пачкодень эрявикс перронти, коза лоткси электричкась» (Г. Пинясов «Аф содаф порог вельф»).
Эряви азомс, придаточнай пяльксса союзнай валхне васьфневихть валмельгакс мархта. Кепотьксонди:
ланга: «Кодак шоподи, Марфа лиси кудсост и пуромихть перьфканза ульцяв якай цератне, а сон ащи ётксост карувонь кулофты пангокс: прясонза якстерь шляпа, конань лангс булавкаса сялкф сенем панчф, къргазонза сотф акша шарф и сяконь кулят эздонза: «Хи-хи да ха-ха» (В. Виард, «Кафтонь-кърда попава»).
Атрибутивнай придаточнайхнень пялькссна сотовихть главнайть мархта нинге подчинительнай союз вельде:
што: «Мяштенц келепнезе лямбось, мяльхне, што аляц нингя аф кудонь анзяй атяня, а пара нежедема васта» (Г. Пинясов «Тяза эшенде седице»);
бъта: «Велеть келес тусь куля, бъта Томскяй туйхнень юрхта вастсост пялевеста кулендевихть юрхтаванятнень авардемасна» (Т. Кирдяшкин «Кели Мокша»).
Атрибутивнай придаточнай пялькссь фалу моли главнай пялькста меле, или сонь кучкасонза и путневи ся валда меле, конань сон тисы шарьхкодевикс.
Максф кепотькснень эзда няеви, што сембода сидеста придаточнай пяльксса васьфневихть тяфтама союзнай валхт: кона, кодама, кие, коста.
Литература
1. Бузаков И.С. Сложное предложение в мордовских языках. Саранск: Мордовское книжное издательство, 1973. — 200 с.
2. Валгина Н.С. Синтаксис современного русского языка. — Москва: Высшая школа, 1991.-319-325 с.
3. Коляденков М.Н. Граммтика мордовских языков. Синтаксис. — Саранск: Морд. книжн. изд-во, 1954. -279-284 с.
4. Мокшень кяль. Синтаксис: учебник / аноклаф-тиф Н.С. Алямкинонь и О. Е. Поляковонь профессорхнень вятемаснон ала. Саранск: Изд-во Мордов. ун-та, 2008. -200 с.