Сигимова Н. Г. Урок – якамо
Уроконь темась: П.С.Кирилловонь «Литова» драмась эрямопингесэ ды искусствасо
Видэсь: кемекстамонь урок. Урок – якамо.
Бажамотне:
— кемекстамс ды домкалгавтомс П. Кирилловонь «Литова» драманть коряс эйкакштнэнь содамочист
— невтемс, кодамо тарка саить «Литовасо» саезь тевесь ды мартонзо сюлмазь прявт геройтне эрямопингесэ ды лия видэнь искусствасо:
- кирвазтемс тонавтницятнень седейс вечкема кезэрень шкатненень ды касома – чачома таркатненень;
— кастомс тонавтницятнень кортамонь культураст ды кель – валонь сюпавчист
Уроконь кедьёнкстнэ: компьютер, презентация, карточкат, книгань невтелма, ж. «Чилисема», «Сятко»
Предметнэнь ютксо сюлмавкстнэ: минек масторонь эрямопингенть, музыканть, живописенть, кинонть, омбомасторонь историянть марто.
Уроконь молема лувось.
1. Шубракстнема: — Шумбратадо, эйкакшт. Течинь урокось а карми молеме лиятнень ёнов. Васняяк, тонавтыцянк тынк аволь Ольга Александровна, а мон – Сигимова Надежда Геннадьевна. Минь тынк марто уроконь перть тейтяно зярыя кармавтомат, конат келейгавтсызь ды домкалгавтмсызь содамочинк «Литова» драманть коряс ютазенть.
Сыргатано лоткамова станциява якамо. Эйстэст кармить улеме вете:
1 – цесь «Литературань», 2 – цесь «Эрямопингень», 3- цесь «Музыкань», 4 – цесь «Живописень ды кинонь», 5 – цесь « Меельце»
Ушодсынек уроконть паро ёжосо.
2. Темань коряс важодема.
1 – це лоткамось «Литературань»
· Максовить (Слайда лангсо ) сёрмадеень фамилият. Эряви явомс эйстэст сетнень, конатвасенцекс путсть путовкс минек литературасо драматургиянть касомасо – вииямосо. (, Ф.М.Чесноков, К.С. Петрова,, П.С.Кириллов, Г.Я. Меркушкин, М.Сайгин, Д.Малышев, С.Аникин)
Тонавтыцясь: Ледстядо неень шкань драматургонь лемть (А.И.Пудин, Н.Б.Голенков, В.И.Мишанина)
· Кие сёрмадынзе неть произведениянтень? «Литова», «Оленька», «Народонть лемстэ», «Кавто братт», «Учительница» (П.С.Кириллов).
· Кона юткстост ловови васенце исторической драмакс? («Литова»)
· Мезе тынь содатадо сонзэ сёрмадомань эрямопингедензэ? Кие драманть теманзо ёвтызе П.С.Кирилловнень?
1 – це тонавтницясь: «Литова» пьесанть лангсо сон важодсь кавто иеть, 1939 – це иестэ ульнесь прядозь.
Тонавтыцясь: П.С.Кириллов «Кода мон роботынь пьесанть лангсо» эсензэ статьясо сёрмадсь: «Мордовской народонть икелень историязо, кода минек ине Родинань весе народтнэнь историясткак пешксе эсензэ олячинть кис героической бороцямонь валдо страницасо. Рузтнэнь, татартнэнь, чуваштнэнь ды лия народтнэнь марто 1670 – 1671 иетнестэ мордовской народось примась участия царской воеводатнень, помещиктнень, духовенстванть, мурзатнень ды лия лепштицятнень каршо крестьянской войнасонть, конань ветицякс ульнесь Степан Разин. Те героической тюремась кирвастизе монь меленть национальной мордовской васенце пьесань сёрмадомо. «Литова» драманть юткс путозь легенда, конань мон сёрмадыя Горьковской областень вейке эрзянь велесэ 1934 иень кизна.Историктнень марто зярыя кортамотне, исторической материалонь ловномась лездась монень народонть икелень шкань эрямонзо тонавтнеме» (Кириллов П. Красная Мордовия, 1939, июнень 29 чи)
2-це тонавтницясь: «Литова» драманть теманзо ёвтызе литераторонтень А.М.Горький ( невтеви слайд №, портрет, валонзо)
… домкасто апак сода эсь народонть устно – поэтической творчестванзо алкуксонь писателекс а касат.
Тонавтыцясь: Сёрмадейтнень васенце Промкссонть молемань читнестэ зярыя раськень сёрмадейтнень марто А.М.Горькиень кедьсэ инжекс ульнесь П.С. Кирилловгак. А.М.Горький тонавтсь, штобу литератортнэ домкасто содавлизь эсь народонть шкинеманзо, конавтомонть алкуксонь сёрмадеекс а касат. Неть валтнэнь кеместэ саинзе превс П.С.Кириллов ды кармась седе виевстэ тонавтнеме раськенть шкинеманзо. Ульнесь ламо эрзянь велесэ, пурнась легендат, морот, ёвкст, валмеревкст, содамоёвкст. Самай секс сонзэ шкинемасонзо ды сехте пек «Литова»драмасонть маряви раськень шкинеманть пельде тонавтнемась. Мейсэ те неяви?
Тонавтницясь: «Литова» драмасонть невтевить койть (паксянь теемась), ютавтови озкс, вастневить меревкст, морот…
Минек литературасо ламот явсть мель сёрмадомс теманть коряс произведеният. Ютксост М.Брыжинский, К.Г.Абрамов, А.Тяпаев…
2 – це лоткамось «Эрямопингень». Седе тов
Тонавтыцясь: Эйкакшт, кода а эсь раськестэ лисезь сёрмадей, парсте невтьсы мокшэрзянь раськенть седикелень эрямонзо. Тынь истя арсетядо? «Литовась» - минек тиринь литературасонть васенце исторической драма. Мейсэ те толковави?
Тонавтницясь: Те драмасонть невтеви кепетевема (восстания), конась вейсэндинзе Рав чирень раськетнень уцяскав эрямонь кисэ тюремасонть.
Тонавтыцясь: Виде. XVII пингесь лововсь, кода лемдизь сонзэ историктне, «бунташный век». Ламо таркава кажов ломантне, беряньстэ эрицятне кепсесть кепетемат эсест нарьгицятнень – лепштицятнень каршо. Паряк, ёвтасынк, кодат неть кепетевематне?, лиякс меремс, а покш восстаният. (Соляный бунт – салонть лангс питненть ламолгавтома, медный бунт – сиянь ярмактнень таркас кармасть нолдамо медень (пижень) ярмакт) ды кепетема, конась соракавтынзе сюпавтнень. Варштадо экранонть лангс ды бажадо максомс каршо валт кевкстематнень лангс. (Слайд № )
Ø Ёвтадо, эйкакшт, кие невтезь те артовкссонть? Кодамо покш тев сюлмавозь сонзэ перька?
(Те — Степан Разин. Сонзэ прявтсо кепетевемась, кона соракавтынзе сюпавтнень, масторонь прявтонть).
Ø Мезе ланганзо содатадо ?
Тонавтницясь: Сон совась Россиянь историяс (эрямопингес), кода сехте покш раськень кепетевемань прявт. Сон ульнесь апелиця, виев ушмо, кона тюрсь раськенть олячинзэ кис, штобу каявлизь аволь олячисэ эрямонть (крепосной праванть). Восстаниясь ульнесь лепштязь, атаманонть маштызь (казнизь)
Ø Ёвтадо, кода мокшэрзянь раськесь сюлмавозь те кепетевеманть марто?.. Кинь лемест сеске ледстневить?
( Алёна Арзамасская (Темниковская), мурза Акай Боляев. Максим Осипов, Михаил Харитонов)
Ø Боярт, мурзат ды воеводат
Сорность Олёнадо пой лопакс.
Истят историясь эзь сода,
Ламонь славаст тень вакссо чоподсть.
Олёна, кода Жанна д Арка,
Эсь народонтень кандсь покш слава. (А.Моро)
Тонавтыцясь: Кодат авань лемть ледстявить те стихотворениясонть? Мезе тынь содатадо лангаст? Мезе вейсэнди неть кавто тейтерьаватнень? Кодамо челькс сынь кадсть эсь раськест эрямопингесэ? (невтеви слайд №)
Тонавтницятне: Неть кавто аватне ушмонь прявтт. Те, нама, дивань тев – сеть шкатнестэ штобу тейтерьава улевель ушмонь прявтсо.
Тонавтницясь: Неть кавто герой – аватне эрясть аволь ве масторсо, аволь ве шкасто, натой, аволь ве пингестэ. Но сынст вейсэнди вейке тев: сынь мелявтсть эсь раськест кис.
Тонавтыцясь: Неть кавто раськень героинятнень ульнесть вейке куломаст: эрийксстэ пултызь толсо. Сынст чумондызь мунямонь тевсэ, неень кельсэ минь бу ёвтавлинек ведунломанекс, колдуньякс.
Нурькинестэ ёвтневи эрьванть ланга.
Васенце кужось ётни Алёна Арзамасскаядо, омбоцесь –Жанна д Аркадо.
Тонавтыцясь: Эрьва шканть, пингенть эсензэ героензэ. Неть кавто ине тейтерьаватне эрить свал эсь раськесэ. Сынст ланга ладсесть морот, легендат, стихотвореният, оперань морыцятне морыть сынст лемест эйстэ арият. Мезе те истямо ариясь. (операсо партия вейке вайгелень эли седямопельксэнь туртов) Минек пряат ошонь оперань ды балетэнь сцена лангсо путозь балет «Алёна Арзамасская» (Слайд № )
А ней ютатано лия лоткамонтень, конань лемезэ «Музыкань».
3- цесь «Седямонь/музыкань». Невтевить экран лангсо лемть : М.Душкский, Л.П.Кирюков, Юдина, Р.Беспалова, И.М.Яушев, Сураев –Королёв, Ф.Шаляпин, Г.Вдовин.
Кармавтома: вейсэндинк лемтнень кужос, конатне топавтсть вейке тев, конась кандови уроконь темантень. М.Душкский, Л.П.Кирюков, Юдина, Р.Беспалова, И.М. Яушев (максозь лемтне путсть вийть музыкальной драманть «Литова» налксемантень)
Вейсэ ледстясынек, мейсэ эрьванть зэмезэ. М Душский — од композитор, эрясь Москов ошсо. Сон явсь мель мокшэрзянь раськень шкинемантень, ульнесь мелезэ содамс сондензэ седе ламо. Сонзэ марто ульнесь содавиксэкс И.М.Яушев, кона се шкастонть тонавтнесь консерваториясо. М. Душский И.Яушев марто сы Мордовияв фольклоронь пурнамо. Сон васенцекс терявтсь сёрмадомо музыка «Литова» драмантень. Ялатеке ульнесть важодемасонть кодат – бути асатыкст. Эрявкшнось истямо виев ёнкс марто седямо, конась невтевлизе эсь гайтьсэнзэ эрзянь раськень ломаненть потмо оймензэ, токавлизе кунсолыцянть седеензэ. Истямо музыка, кодамо эрявсь, сёрмадсь Л.П.Кирюков. Нама сонзэ важодемазо кандсь покш питне музыкальной драмань ушодкссонть целанек, васняяк «Литова» пьесась. Весероссиянь музыкань драматнень ютксо пелькстамосонть «Литовантень» максозь покш питнесь – 1 –це таркась.
Юдина ды Р.Беспалова морызь Литовань ариянть. Кунсолови И.М.Яушевень вайгелесь. Моры Арчиловонь ариянть (нолдави морось). И.М. Яушев васенцеде сцена лангсо морась эсь тиринь кельсэнзэ. Мейле сонзэ репертуарсонзо кармасть вастневеме седе ламо эрзянь мороткак.
Эрьвадонть ламо кортамо а карматано. Арсян, што эрьва лементь марсинк аволь весть, содатадо, кодамо путовксост искусствасонть.
Тонавтыцясь: Ламоксть кортамстон ледстнян валонть опера. Мезе истямось опера? Либретто?
Оперась – 1. Музыкально – драматическое произведение, предназначенное для исполнения в театре, а также театральное представление, в котором действующие лица поют в сопровождении оркестра.
2. Театр, в котором ставятся такие произведения. (Слайд …. Театр оперы и балета им. И.М.Яушева)
Либретто- 1. Словесный текст театрализованного музыкально – вокального произведения.
2. Краткое изложение содержания пьесы, оперы, балета.
3. План сценария.
Музыкальной оперась невтевсь:
v Эйсюрковонь 29 – це чистэ 1939 – це иестэ
v Панжиковонь 27- це чистэ 1943 – це иестэ.
v Таштамковонь 16 –це чистэ 1959 – це иестэ. (Слайд…)
4 – цесь «Живописень ды кинонь»
Тонавтыцясь: Артыцясь (художникесь) – те пек вадря, ёроков ломань, кона маштозь неи мезе – бути од натой сехте койс саезь, тонадозь образтнэсэ. Истямо покш эрямопингень тевенть невтемантень артыцятне алтасть артовкст, режиссёртнэ – кинот. Эдь артыцятнененьгак ды режиссёртнэненьгаг эрявкшнось ламо шка ютавтнемс архивень нупальтнесэ , ванкшномс исторической материалт. Сёрмадызь неть артовкстнэнь?
Невтевить артовкст. Ёвтынк, кить авторост? (слайд № )
«Степан Разин» (1) 1. В.И.Суриков
«Осада Саранска разинцами» (3) 2. И. Мясников
«Сожжение Алёны в Темникове» (2) 3. В. Хрымов
Нурькинестэ ёвтневи максозь картинатнень ланга. Васенце кужось нурькинестэ ётни «Степан Разин» картинанть коряс, омбоцесь – «Сожжение Алёны в Темникове» ( Слайд № )
«Степан Разин»
1. Артовксось дивавты эйсэнек певтеме ёжомарямосо. Коштось прок валозь чинь валдосо, секс артовксонь коцтось пештязь истямо морамонь ёнкссо. Артыцясь тевс нолдась мазый артомань тюст, конатне сияждыть чинь налтнэсэ. Келей ине рузонь леесь. Валскень сэтьмечи. Шоэдасто уи Равонть ланга венчесь, валдомтозь сырнень цивтордомасо.
2. Олянь ушмось велявты прикаспиянь чиретнень лангс каявомадо мейле. Ламо ули – паро саезь, секс весень потмоёжост паро. Весёлгалить, морыть, симить. Вейкесь натой эйстэст матедевсь венчень удалксонть лангс.Ансяк атаманось Степан Разин аволь весёла – сон пельсмадезь келей вармамевтенть ало, нежедезь сюпав камбразонть лангс, ды стака арсема нусмакавты чачонзо. Мезде сон арси, чарькодемс стака.
3. В.И.Суриковнень удалась панжомс те ломаненть потмоёжонзо, конась неяви стакакс. Паряк, сон арси Россиядонть ды бажи, што косо – бути тосо, васолксонть томбале, ков сынь уить, карми овсе лия эрямо.
4. «Степан Разин» картинась –В. Суриковонь остатка исторической важодемазо. Сон сёрмадовсь 1903 це иестэ саезь 1907 – це иес молемс. Разин, кона ловови народонть эйстэ олянь ёвтыця — свал явовты эсензэ лангс народонть вановтонзо. Ламо иень перть сон ульнесь раськень шкинемасо героекс. Сонзэ ланга ладсесть морот, легендат.
«Сожжение Алёны в Темникове»
1.Минек икеле ламо ёнксонь композиция. Икельце лувсонть невтезь палыця толпандя, конасонть ашти сюлмсезь палманьс кшнинь рисьмесэ тейтерьава. Сонзэ лангсо эрзянь викшнезь панар, сезнезь ды ваднезь верьсэ. Те корты седее, што сонзэ пек муцясть. Ашо прячерензэ нолдазь ланга, лицязо пурдазь пижнемасо.
2. Вакссонзо цёраломань, конань кедьсэ чумондомань конёв, косо ульнесь сёрмадозь Алёнань колдовамонь тевсэнзэ чумондомазо. Те ломаненть бокасо маштыця, конась сыремти толпандя. Вить ёно толпандянть эйстэ — колмо цёраломанть, цёрьковань ломань, бояр ды ушмонь прявт.
3.Омбоце лувсонть — стрелецт леднемань кедьёнкс марто, конат пиризь лия пурназь ломантненень кинть, штобу сынь а каявольть Алёнань идеме. Алёна эсь прянзо кирдсь кеместэ, куломадонзо икелеяк кенерсь ёвтамс, што эряви тюремс эсь лепштицятнень каршо истя, кода сон ды лия маштозетне.
4. Овсе удало лувсонть неяви ошпандонь чутонь пирявкс, церьковань куполт. Иень шкась тесэ невтезь теле, пертьпельксэсь валдомтозь а пек валдосто. Хоть и авторось сайсь мазый артомань тюст, ялатеке мелеть а кепети, а кенярдовты. Тесэ невтезь стака кулома – эриксстэ толпандясо палома.
П.С.Кириллов сёрмадсь зярыя киносценарийть (кавто киноочеркензэ коряс ульнесть теезь кинот: «Лавровская учительницась» ды «Мордовской Республикантень 20 иеть». Нама, киносценарий ульнесь сёрмадозь «Литова» драманть коряскак.
5 – цесь « Меельце» Прядовома лангсо минек урокось. Арсян, сон эзь юта лезэвтеме. Ули мелем содамс, мезе одонть кармиде содамо урокстонть.
- карминек содамо од композиторонть М.И. Душскиень ланга, кона явсь мелень минек раськенть шкинемантень ды сёрмадсь музыка «Литова» драмантень.
— карминек содамо, што «Литовась» аволь ансяк васенце исторической драма, а истя жо васенце музыкальной драма.
— ваннынек зярыя артовкст, конатне алтазь Степан Разинэнь прявтсо кепетевеманть невтемантень, конатнень лангсо артыцятне эрявикс тюссо, эсь ладсо невтизь прявт геройтнень, целанек весе раськенть олячинь, паро эрямонь кис тюремаст, кемечист, смелчист.
— карминек содамо, што те тевентень алтазь и лия сёрмадейтнень произведенияст, конатне невтезельть книгань невтелмасонть (М.Брыжинский «Ради братий своих» повесть, К.Абрамов «Олячинь кисэ » роман.)
— Тонавтыцясь:
Кортыть, эрьва ломаненть ули эсензэ тештезэ. лотки чавомодо седеезэ — пры – палы тештезэяк. Койсэнь, зярдояк а мадить тештест сеть ломантнень, конат максызь эрямост эсь раськенть оляв, уцяскав эрямонть кис.
Койсэнь, зярдояк а мадить тещтест сёрмадейтнень, композитортнэнь, артыцятнень, морыцятнень, кить ойместэ лисиця валсо, мазый музыкасо, эрявикс артомань тюссо ёвтнить минек раськень содавикс ломантнеде, сынст ине тевдест. Сынь велявтыть нармунекс ды эсь моросост кармить ледстнеме масторлангонь эрямонть.
А миненек, неень ды сыця шкань эрицятненень, а эряви стувтнемс эсь раськень содавикс ломантнеде.
Сюкпря, эйкакшт паро важодеманть кисэ. Арсян, што течинь урокось лезды тенк сочинениянь сёрмадомасонть. Арсян весенень кеме шумбрачи, уцяска, вечкема, изнявкст эрьва тевсэ. Вастомазонок!